ភ្នំពេញ៖ រដ្ឋមន្ត្រីក្រសួងកសិកម្ម ស្វាគមន៍អតីតបុគ្គលិកនៃស្ថាប័នសារព័ត៌មាន VOD ទាំង១១រូប ដែលនឹងចូលមកបម្រើការងារនៅក្រសួងកសិកម្ម រុក្ខាប្រមាញ់ និងនេសាទ នាពេលខាងមុខ។

នេះបើតាមសារបង្ហោះលើបណ្តាញសង្គមរបស់រដ្ឋមន្រ្តីក្រសួងកសិកម្ម លោក ឌិត ទីណា នៅថ្ងៃទី២៩ ខែមីនា ឆ្នាំ២០២៣។

សាររបស់លោក ឌិត ទីណា បានឱ្យដឹងថា៖ «សូមស្វាគមន៍អតីតបុគ្គលិកនៃស្ថាប័នសារព័ត៌មាន VOD ទាំង ១១រូប ដែលនឹងចូលមកបម្រើការងារនៅក្រសួងកសិកម្ម រុក្ខាប្រមាញ់ និងនេសាទ នាពេលដ៏ឆាប់ខាងមុខ»។

ជាមួយគ្នានេះ រដ្ឋមន្រ្តីកសិកម្មមានក្តីសង្ឃឹមថា តាមរយៈចំណេះជំនាញរបស់អតីតបុគ្គលិកទាំង ១១រូបនេះ នឹងអាចដើរលើមាគ៌ារួមមួយ ដើម្បីជួយវិស័យកសិកម្មកម្ពុជាឱ្យកាន់តែរឹងមាំ និងខ្លាំងក្លា។

គួរឱ្យដឹងដែរថា សារព័ត៌មានអនឡាញ VOD ត្រូវបានក្រសួងព័ត៌មានលុបអាជ្ញាប័ណ្ណជាផ្លូវការនៅព្រឹកថ្ងៃទី១៣ ខែកុម្ភៈ ឆ្នាំ២០២៣ បន្ទាប់ពីសារព័ត៌មានអនឡាញធំមួយនេះបរាជ័យក្នុងការសរសេរលិខិតសុំទោសរាជរដ្ឋាភិបាលកម្ពុជា និងលោក ហ៊ុន ម៉ាណែត បន្ទាប់ពីបានផ្សាយព័ត៌មានខុសដែលថា លោក ហ៊ុន ម៉ាណែត បានចុះហត្ថលេខាជំនួសនាយករដ្ឋមន្ត្រីក្នុងការផ្ដល់ជំនួយទៅកាន់ប្រទេសតួកគី។

ហើយនៅថ្ងៃទី១៤ ខែកុម្ភៈ ឆ្នាំ២០២៣ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានប្រកាសសម្រេចផ្តល់ក្របខណ្ឌរដ្ឋសម្រាប់បុគ្គលិក VOD ដែលបាត់បង់ការងារបន្ទាប់ពីបិទសារព័ត៌មាន VOD៕